၁၅ အောက်တိုဘာ ၁၉၆၇
ကိုလံဘို လူသတ်မှု ပဟေဠိ
room Sri Lanka
ကျိုင်းတုံစော်ဘွားဟောင်း စဝ်ကွန်ကျောက် အင်တလိုင်၏ သားငယ် ဖြစ်သူ စဝ်ဘွန်ဝှက်သည် သံတမန်အရာရှိ တစ်ဦး ဖြစ်သည်။ ၁၉၆၇ ခုနှစ်တွင် သူသည် စီလုံပြည် (ယခု သီရိလင်္ကာနိုင်ငံ၊ Sri Lanka) ဆိုင်ရာ မြန်မာသံအမတ်ကြီး အဖြစ် ကိုလံဘိုမြို့ (Colombo) တွင် ဇနီးဖြစ်သူ စဝ်နန်းလောင်ဟိန်း ခေါ် ရှယ်လီဘွန်ဝှက် (Shirley Boonwaat) နှင့် အတူ နေထိုင်ခဲ့သည်။ ၁၉၆၇ ခုနှစ် အောက်တိုဘာလ ၁၅ ရက်နေ့တွင် ရှယ်လီဘွန်ဝှက် သေဆုံးသွားခဲ့ပြီး သူမ၏ ရုပ်အလောင်းကို ချက်ချင်း မီးသင်္ဂြိုလ်ခဲ့သည်။ နောက်ရက်အနည်းငယ် အကြာတွင် စဝ်ဘွန်ဝှက်လည်း ထိုနိုင်ငံကို အပြီးတိုင် စွန့်ခွာသွားခဲ့သည်။ နောက်ရက်သတ္တပတ်များ အတွင်း ကိုလံဘိုမြို့တွင် လူသတ်မှုကို ဖုံးကွယ်သည်ဟု စွပ်စွဲချက်များနှင့် ကျွက်ကျွက်ညံသွားခဲ့သည်။ အမှန်တကယ် မည်သို့ဖြစ်သွားသည်မှာ ယနေ့ထိ ပဟေဠိတစ်ရပ် အဖြစ် ရှိနေဆဲသာ။ သိရှိရသမျှမှာ အောက်ပါအတိုင်း ဖြစ်သည်။
ထိုနေ့ မနက်စောစောက စီလုံလူမျိုး ပန်းရံဆရာ လူငယ်သုံးယောက်သည် သေနတ်သံများ ကြားခဲ့ပြီး မြန်မာသံအမတ် အိမ်တော်ဝန်း အတွင်း အမျိုးသား တစ်ဦးက ကားဆီသို့ ထွက်ပြေးနေသော အမျိုးသမီး တစ်ဦးကို သေနတ်နှင့် ပစ်ပြီး နောက်အမျိုးသား တစ်ဦးက အဆိုပါ အမျိုးသမီးကို အိမ်ထဲသို့ ပြန်လည်ဆွဲခေါ်သွားသည်ဟု ရဲထံတွင် ထွက်ဆိုခဲ့သည်။
မနက် ၉ နာရီခွဲတွင် စီလုံလူမျိုး ဆရာဝန်တစ်ဦးကို အိမ်တော်ထဲသို့ ပင့်ဆောင်ခဲ့၍ မစ္စဘွန်ဝှက်သည် ဦးနှောက်သွေးယိုစိမ့်မှုကြောင့် သေဆုံးကြောင်း ဆရာဝန်က အတည်ပြုပေးခဲ့သည်။ ဆရာဝန်က သေဆုံးသူကို လှေကားခြေရင်းတွေ တွေ့ခဲ့ရသည်၊ ရုပ်အလောင်းကို ရင်ခွဲစစ်ဆေးရန် ခွင့်တောင်းရာ ခွင့်မပြုခဲ့ဟု ရဲကို ထွက်ဆိုခဲ့သည်။ ရုပ်အလောင်းကို ထို့နေ့ နေ့လည် ၁ နာရီတွင် အနီးအနားရှိ သုသာန်၌ မီးသင်္ဂြိုလ်ခဲ့သည်။
ထိုအချိန်တွင် သေနတ်ပစ်ခတ်မှု ဖြစ်ပွားသည် ဟူသော သတင်းပျံ့သွားသဖြင့် အိမ်တော်ဝန်းရှေ့တွင် လူစုလူဝေးများနှင့် စည်ကားနေတော့သည်။ ကိုလံဘိုရဲတပ်ဖွဲ့က စုံစမ်းစစ်ဆေးမှုကို စတင်ခဲ့သော်လည်း သံတမန်နေအိမ်ထဲသို့ ဝင်ခွင့်မရခဲ့။ စီလုံအစိုးရကလည်း မြန်မာလူမျိုးများ နိုင်ငံကို စွန့်ခွာမသွားစေရန် သင်္ဘောဆိပ်နှင့် လေဆိပ်များတွင် တားမြစ်မိန့် ထုတ်ခဲ့သည်။
မစ္စဘွန်ဝှက်သည် စီလုံ လူကုံထံ အသိုင်းအဝိုင်းတွင် တွေ့ရလေ့ရှိသူ ဖြစ်ပြီး ရင်းနှီးသူများက "ခပ်ချောချောနှင့် လူချစ်လူခင် ပေါသူ" ဟု ဆိုကြသည်။ များမကြာခင်မှာပင် နာမည်ကျော် Club 388 နိုက်ကလပ်တွင် The Rhythm Dukes တီးဝိုင်းနှင့် အတူ ဖျော်ဖြေသော စီလုံလူမျိုး ရက်စ်ဒီဆေးဗား (Rex de Silva)နှင့် မစ္စဘွန်ဝှက်တို့ အိမ်ထောင်ရေး ဖောက်ပြားမှု ဖြစ်ခဲ့သည် ဟူသော ကောလဟာလများ ပေါ်လာပြန်သည်။ သူတို့နှစ်ဦးသည် နှစ်ပေါင်းများစွာ ရင်းနှီးသော ဆက်ဆံရေး ရှိသည်ကို ကိုလံဘို အထက်တန်းလွှာက ကောင်းစွာ သိရှိခဲ့ကြသည်။ စီလုံလူမျိုး အများစုက မစ္စဘွန်ဝှက်က အိမ်ထောင်ရေး ဖောက်ပြားမှု ရှိသောကြောင့် သူ့ခင်ပွန်းက သတ်ပစ်ခဲ့ခြင်း ဖြစ်နိုင်သည်ဟု ခန့်မှန်းခဲ့ကြသည်။
ရက်အနည်းငယ် အကြာတွင် စဝ်ဘွန်ဝှက်သည် သံတမန် ကင်းလွတ်ခွင့် တောင်းဆိုကာ ရန်ကုန်မြို့သို့ ပြန်သွားခဲ့သည်။ နောင်တွင် ပြင်သစ်နိုင်ငံဆိုင်ရာ မြန်မာသံအမတ် အဖြစ် ခန့်အပ်ခံရသည်။ ဤဖြစ်ရပ်တွင် အမှန်ဖြစ်ခဲ့သည်များကိုမူ ယနေ့တိုင် အတည်မပြုနိုင်ခဲ့ပေ။ လတ်တလောနှစ်များ အတွင်း ထိုအမှုသည် မဖြေရှင်းရသေးသော အမှု အဖြစ်လည်းကောင်း၊ သံတမန် ကင်းလွတ်ခွင့်ဖြင့် တရားဥပဒေကို ရှောင်ရှားခဲ့သော သာဓက ဖြစ်သောကြောင့်လည်းကောင်း ပြန်လည်၍ စိတ်ဝင်စားလာကြပြီး သတင်းဆောင်းပါးများနှင့် ဖြစ်ရပ်မှန် မှုခင်းဆိုင်ရာ အစီအစဥ်များတွင် ပြန်လည် ဖော်ပြကြသည်။ သို့သော် သဲလွန်စသစ်များကမူ ထွက်ပေါ်မလာပေ။