၁၈၉၇ - 1990s
ဂျော့ချ်အိုဝဲလ် သွားနေကျ ရန်ကုန် စာအုပ်ဆိုင်
room United Kingdom
“ရန်ကုန်ခရီးစဉ်များရဲ့ အရသာကတော့ စမာ့တ်အန်မူခါဒန် (Smart & Mookerdum) စာအုပ်ဆိုင်သွားပြီး အင်္ဂလန်ပြည်မှာ အသစ်ထွက်တဲ့ ဝတ္ထုစာအုပ်တွေကို သွားဝယ်ရတာပါပဲ…” ~ ဂျော့ချ်အိုဝဲလ်
တစ်ချိန်က ရှိခဲ့ဖူးသည့် ဆူးလေဘုရားလမ်းမှ စမာ့တ်အန်မူခါဒန် စာအုပ်ဆိုင်သည် အလွန် ထူးခြားသော နေရာတစ်ခု ဖြစ်သည်။ ရန်ကုန်မြို့တွင် ပြိုင်ဘက်ကင်းသော အင်္ဂလိပ်ဘာသာ စာအုပ်များ ရောင်းချသည့် ဆိုင် ဖြစ်သည်။ စာရေးဆရာကြီး ဂျော့ချ်အိုဝဲလ် သာမက ခေတ်အဆက်ဆက် မြန်မာ့ခေါင်းဆောင်များ ဖြစ်သည့် ဗိုလ်ချုပ်အောင်ဆန်း၊ ဦးသန့်နှင့် ဦးနုတို့ အပါအဝင် မြန်မာတို့၏ အနှစ်သက်ဆုံး စာအုပ်ဆိုင် ဖြစ်ခဲ့ပေသည်။
ယင်းစာအုပ်ဆိုင်ကို ၁၈၉၇ ခုနှစ်က စတင်ဖွင့်လှစ်ခဲ့ပြီး (ကုန်သည်လမ်းနှင့် ဖဲယားလမ်းထောင့်) နောင်တွင် ဆိုဖယ်အဆောက်အဦသို့ ပြောင်းသွားခဲ့သည်။ နောက်ပိုင်းတွင် ဘားလမ်း၊ ထိုမှ နောက်ဆုံးတွင် ပုံတွင် ဖော်ပြထားသည့် မောင်ဂိုမာရီလမ်းထောင့် အနီး၊ ဆူးလေဘုရားလမ်းပေါ်သို့ ပြောင်းရွှေ့ ဖွင့်လှစ်ခဲ့သည်။ ၁၉၆၀ပြည့်နှစ်များတွင် ပြည်သူပိုင် သိမ်းခံရပြီး မကြာမီ အရောင်းအဝယ် ကျသွားတော့သည်။ စာအုပ်ဆိုင်တည်ရှိရာ အဆောက်အအုံကို ၁၉၉၀ ပြည့်နှစ်များအတွင်းက ဖြိုချလိုက်ကြပြီး ယခင်က ဆိုင်တည်ရှိခဲ့သော နေရာသည် ယခုအခါ ဆူးလေရှမ်ဂရီလာ ဟိုတယ် (Sule Shangri-la) ဖြစ်နေပြီ ဖြစ်သည်။
ပုံ : စမာ့တ်အန်မူခါဒန် စုဆောင်းမှု (The Smart & Mookerdum Collection)
ဗြိတိသျှ မြန်မာ (၁၈၂၆ - ၁၉၄၂) မှ နောက်ထပ် အကြောင်းအရာများ ဆက်လက်လေ့လာရန်