ဧပြီ ၁၉၅၅
၁၉၅၅ ခုနှစ် ဘန်ဒေါင်းညီလာခံသို့ အသွား
room Myanmar
people ဦးနု Pandit Nehru U Ba U President Nasser Pham Van Dong Sardar Muhammad Naim Chou Enlai Chen Yi
၁၉၅၅ ခုနှစ် ဧပြီလတွင် ကျင်းပခဲ့သော ဘန်ဒေါင်းညီလာခံ (Bandung Conference) သည် ထိုခေတ်အခါက မြန်မာပြည်၏ အင်တိုက်အားတိုက် ရှိလှသော အပြည်ပြည်ဆိုင်ရာ သံတမန်ဆက်ဆံရေး၏ သက်သေသာဓက တစ်ခုပင် ဖြစ်ပါသည်။ ထို့အပြင် အပြည်ပြည်ဆိုင်ရာ လေကြောင်းခရီးတွင် မင်္ဂလာဒုံလေဆိပ်၏ အခရာကျစွာ အရေးပါခဲ့မှုကို သက်သေပြခဲ့ပါသည်။ ထိုစဉ်က အင်ဒိုနီးရှားနိုင်ငံ (Indonesia) သို့ သွားမည်သူများသည် ရန်ကုန်မြို့တွင် မဖြစ်မနေ ခရီးတစ်ထောက် နားကြရသည်။ ဘန်ဒေါင်းညီလာခံသို့ သွားရောက်မည့် နိုင်ငံ့ခေါင်းဆောင်များသည် ရန်ကုန်မြို့တွင် ခရီးတစ်ထောက် နားကြ၍ သမ္မတ ဦးဘဦးက အစိုးရအိမ်တော်တွင် ညစာစားပွဲ ကျင်းပပြီး တည်ခင်းဧည့်ခံခဲ့သည်။
ဘန်ဒေါင်းညီလာခံကို အင်ဒိုနီးရှားနိုင်ငံ၊ ဘန်ဒေါင်းမြို့ (Bandung) တွင် ကျင်းပခဲ့ပြီး အာရှနှင့် အာဖရိကနိုင်ငံ ၂၉ နိုင်ငံ တက်ရောက်ခဲ့သည်။ ညီလာခံ၏ ရည်ရွယ်ချက်မှာ ကမ္ဘာတွင် လတ်လတ်လောလော လွတ်လပ်ရေး ရလာသည့် နိုင်ငံများ ပူးပေါင်းဆောင်ရွက်မှု မြှင့်တင်ရေး ဖြစ်ပြီး အမေရိကန် ပြည်ထောင်စု (United States of America) နှင့် ဆိုဗီယက် ပြည်ထောင်စု (Soviet Union) တို့၏ အရှုပ်တော်ပုံတွင် မပါဝင်ကြရေး ဖြစ်သည်။ ဦးသန့်သည် ညီလာခံ၏ အတွင်းရေးမှူး အဖြစ် ဆောင်ရွက်ခဲ့သည်။ ၁၉၅၀ ပြည့်နှစ်များက မြန်မာနိုင်ငံသည် နိုင်ငံတကာ အသိုင်းအဝိုင်းတွင် ဂုဏ်သရေ ကြီးမြင့်ခဲ့ကြောင်းကို ယနေ့အခါ မထင်မှတ်ထားကြပေ။ ထို့အပြင် မြန်မာနိုင်ငံသည် ကမ္ဘာ့ရပ်ဝန်းတွင် တက်ကြွစွာ ပါဝင်၍ အတွေးအမြင်များ မျှဝေခြင်း၊ ကုလသမဂ္ဂ (United Nations) အဖွဲ့ကြီးမှ တစ်ဆင့် နိုင်ငံတကာ နိုင်ငံရေးရပ်ဝန်းတွင် ပါဝင်ခဲ့ခြင်း၊ နိုင်ငံရပ်ခြားမှ ကုလသမဂ္ဂ ငြိမ်းချမ်းရေး လုပ်ငန်းစဥ်များသို့ တပ်ဖွဲ့များ စေလွှတ်ခဲ့ခြင်းနှင့် ကမ္ဘာ့ပြည်သူကောင်း အဖြစ် ပါဝင်ခဲ့ခြင်းတို့ကို ယနေ့ခေတ်တွင် ယုံရခက်သည်။
ဖော်ပြပါဓာတ်ပုံမှာ အစိုးရအိမ်တော်တွင် ရိုက်ကူးထားခြင်း ဖြစ်သည်။ ပုံတွင် ပါဝင်သူများမှာ (ဝဲမှယာသို့) မြောက်ဗီယက်နမ်နိုင်ငံ နိုင်ငံခြားရေး ဝန်ကြီး နောင်တွင် ဝန်ကြီးချုပ် ဖန်ဗန်ဒွန် (Pham Van Dong)၊ အာဖဂန်နစ္စတန်နိုင်ငံ နိုင်ငံခြားရေး ဝန်ကြီး ဆာဒါမူဟာမက်နိမ် (Sardar Muhammed Naim)၊ တရုတ်နိုင်ငံ ဝန်ကြီးချုပ် ကျိုးအန်လိုင် (Zhou Enlai)၊ သမ္မတကြီး ဒေါက်တာဘဦး၊ အိန္ဒိယနိုင်ငံ ဝန်ကြီးချုပ် နေရူး (Nehru)၊ အီဂျစ်နိုင်ငံ သမ္မတ ဂမယ်လ်အဗ္ဗဒယ်လ်နက်ဆာ (Gamal Abdel Nasser)၊ တရုတ်နိုင်ငံ နိုင်ငံခြားရေး ဝန်ကြီး ချန်ရိ (Chen Yi) နှင့် ဝန်ကြီးချုပ် ဦးနုတို့ ဖြစ်ပါသည်။ နောက်တစ်ရက်တွင် မြန်မာ့ရိုးရာ နှစ်သစ်ကူး သင်္ကြန်ပွဲတော် စတင်သည် ဖြစ်ရာ ဝန်ကြီးချုပ် ဦးနု၏ တိုက်တွန်းမှုကြောင့် သမ္မတ နက်ဆာနှင့် နေရူးတို့သည် မြန်မာဝတ်စုံများ ဝတ်ဆင်ကာ သင်္ကြန်ပွဲတော်ကို ပါဝင်ဆင်နွှဲခဲ့ကြသေးသည်။ ပုံတွင် ရန်ကုန်မြို့၊ ကုန်သည်လမ်းတွင် ၎င်းတို့ ရေကစားနေကြသည်ကို တွေ့နိုင်ပါသည်။
ပြည်တွင်းပြည်ပ ၁၉၅၀ ပြည့်နှစ်များ မှ နောက်ထပ် အကြောင်းအရာများ ဆက်လက်လေ့လာရန်