သမိုင်းမတွင်မီနှင့် ရှေးခေတ် သမိုင်းကြောင်း

ယနေ့မြန်မာနိုင်ငံ ဖြစ်လာမည့် ဒေသတွင် လွန်ခဲ့သည့် နှစ်သန်းချီကပင် ရှေးလူသားများ နေထိုင်ခဲ့ကြသကဲ့သို့ မိမိတို့၏ ဘိုးဘေးများ ဖြစ်လာခဲ့သော ခေတ်လူသားတို့သည်လည်း လွန်ခဲ့သည့် နှစ်ထောင်ချီက အာဖရိကတိုက်မှ ထွက်ခွာလာပြီးနောက် မြန်မာနိုင်ငံ တည်ရှိရာတွင် အခြေချ နေထိုင်ခဲ့ကြသည်။ ယနေ့ မြန်မာနိုင်ငံရှိ လူအများစုသည် မြောက်အရပ်မှ ပြောင်းရွှေ့ဝင်ရောက်လာသည့် တိဘက်-မြန်မာနွယ် ဘာသာစကားများနှင့် အခြားသော ဘာသာစကားများကို ပြောသောသူများမှ ဆင်းသက်လာသည်။ ထိုထက် ဝေးလံသော ဒေသများက ပြောင်းရွှေ့လာသူများမှ ဆင်းသက်လာသူ များစွာလည်း ရှိသည်။ ထိုသို့ဖြင့် မြန်မာနိုင်ငံ တည်နေရာ ဒေသတွင် အစဥ်အဆက်ကပင် ပြောင်းရွှေ့နေထိုင်သူ စုံလင်ခဲ့ပြီး ယနေ့ခေတ်၏ ထူးခြားသည့် လူမျိုးစုံ ရောနှောပါဝင်သော သရုပ်လက္ခဏာများကို ဖြစ်ပေါ်စေခဲ့သည်။ 

မြန်မာနိုင်ငံ၏ သမိုင်းမတွင်မီခေတ်နှင့် လွန်ခဲ့သည့် နှစ်တစ်ထောင် ကာလက သမိုင်းကြောင်းများကို ယနေ့ထိ တစ်ပိုင်းတစ်စသာ သုတေသနပြုနိုင်ခဲ့သည်။ ဤအပိုင်းတွင် ပျောက်ဆုံးနေသော လူအဖွဲ့အစည်းများ၊ ရှေးလူများ၏ ရုပ်ကြွင်းများမှသည် ယနေ့ထိ ကျင့်သုံးနေဆဲ ဖြစ်သော ဓလေ့များ အကြောင်း စသည့် အတည်ပြုနိုင်သော အယူအဆများနှင့် လေ့လာတွေ့ရှိ အတည်ပြုရန် လိုနေသေးသော အတွေးအမြင်များကို ဖော်ပြထားသည်။